Friday, 29 May 2015

ஒரு நிம்மதிக்கும் இன்னொரு நிம்மதிக்கும் நடுவே


ஷங்கர்ராமசுப்ரமணியன்


கூப்பிடும் தூரத்தில்தான் நிற்கிறது
காவலர் ரோந்து வாகனம்
துப்பாக்கிகள் உறங்கிக்கொண்டிருக்கின்றன
அப்போதைக்கு
உயர்நீதிமன்றம், தலைமைச் செயலகம், தேவாலயம்
எல்லாம்
வெறும் நடைதூரத்தில் சிதறியிருக்கின்றன

தாடி வைத்திருந்த அவன்
இறுக்கமாய் அந்தத் தொழிற்சாலையின்
இரும்புவேலிச் சுவரில் சாய்ந்து
நின்றுகொண்டிருக்கிறான்
அவன் சட்டைக்குள் வலதுகை
நுழைத்து
ஏதோ ஒன்றை
பொதிந்து மறைத்திருக்கிறான்
அவன் மார்பைப் பிடித்து
அதைக் கொடுத்துடுறா
அதைக் கொடுத்துடுறா
என அவள்
தன் உடை குலைய
எச்சிலும் கண்ணீரும் வழியக்
கெஞ்சி இரைகிறாள்
   

ஒரு நிம்மதிக்கும்
இன்னொரு நிம்மதிக்கும் இடையே
கலவரத்தின் முனைகள் இருக்கும்
அவற்றைக் கடந்துவிட வேண்டும்
நழுவும் உலகை
சாமர்த்தியத்துடன் பற்றிப் பிடித்து
பொது இடங்களைக் கடக்கின்றனர் பொதுமக்கள்
அச்சத்துடன் அவரவர் கவலைகளை
ஒருமுறை  பார்த்துக் கொண்டு
வீடு திரும்புகின்றனர்

பரபரப்பான அந்த நடைபாதையில் தான்
அவன் அசையாமல் நிற்கிறான்
அவளது கோரிக்கையில்
முன்பு அவர்கள் பகிர்ந்திருக்கக் கூடிய
அந்தரங்கம் தெரிந்தது
அந்த அந்தரங்கத்தின் சுழியில்தான்
அவள் தற்போது தன்னந்தனியாகச் சிக்கியிருக்கிறாள்

அவனுடையதல்லாத ஒன்றைக் கேட்டு
அவள் பெருநகர சமுத்திரத்தில்
அலைகளென
மறுபடி மறுபடி
அழுது இரைந்துகொண்டிருக்கிறாள்

Sunday, 24 May 2015

நித்யா…அநித்யா

 ஷங்கர்ராமசுப்ரமணியன்


  




   அவளுக்குப் பெயர்
   மைசூர் சாண்டல்.
   அம்மாவை டவ் ஷாம்பூ
   என்று கொஞ்சுகிறாள்
   பாட்டிக்கு பாண்ட்ஸ் பவுடர்
   அன்பின் நிலைத்த உருவங்களுக்கு
   அநித்யமாய் கரைந்துவிடும்
   பொருட்களின் பெயர்களைச்
   சூட்டுகிறாள்
   நித்யா
   அநித்யா
 



Saturday, 2 May 2015

இந்த நாற்பது வயதில்

ஷங்கர்ராமசுப்ரமணியன்



இந்த வருடத்தின்
சுயமதிப்பீட்டுப் படிவத்தை நிரப்பி
மேலதிகாரியிடம்
கொடுத்துவிட்டு
கழிப்பறை சென்று
நிலைக்கண்ணாடியில்
முகம் பார்த்த போது 
பார்த்தேன்
நான் சலித்திருக்கிறேன்
எனது நரைமுடிகள் நீளமாகியிருக்கின்றன

ஏன்
இப்போதெல்லாம்
குழந்தைகள் பிறந்த தகவலை
நண்பர்கள் பகிரும்போதோ
தெரிந்த பெண்கள்
திருமணப் பத்திரிகை
தரும்போதோ
கண்கள் துளிர்க்கின்றன


புளித்த மாவு தோசையின்
மணமடிக்கும் போதெல்லாம்
செத்துப்போன என் பெரியம்மா
வீட்டுக்குள் நுழைந்து விடுகிறாள்

எல்லாம் நுரைத்திருக்கும்
என் இந்த நாற்பது வயதில்
ஏன் என்னைத் தனியாக
விட்டுப்போனாய்
பெரியம்மா